ខេត្តបាត់ដំបង៖ សត្វជ្រឹងរាប់ពាន់ក្បាល បានប្រមូលផ្តុំគ្នារស់នៅតាមដើមឈើធំៗជាច្រើនដើមនៅក្នុងបរិវេណក្បែវត្តបាយដំរាំ ដែលមានទីតាំងស្ថិតក្នុងភូមិបាយដំរាំ ឃុំបាយដំំរាំ ស្រុកបាណន់ ចម្ងាយពីទីរួមខេត្តបាត់ដំបង ប្រមាណ ១៤គ.ម ក្លាយជាគោលដៅទាក់ទាញភ្ញៀវទេសចរណ៍។

អាជីវករលក់ដូរនៅភូមិសាស្ត្រខាងលើ លោក ហឿន សុផល បានលើកឡើងថា ប្រវត្តិហ្វូងសត្វជ្រឹងទាំងនេះគឺវាមករស់នៅតាំងពីអំឡុងឆ្នាំ១៩៩០ ជាងមកម្លេះ ដោយនៅរស់នៅរាយបាយតាមវាលស្រែ។ ប៉ុន្តែដោយសារតែមានការដេញបាញ់ប្រហារទើប ពួកវាក៏បានប្តូរទីតាំងមករស់នៅតាមដើមឈើក្នុងវត្តបាយដំរាំ និងបន្តមករស់នៅតាមដើមឈើខាងក្រៅក្បែរបងវត្តរហូតដល់សព្វថ្ងៃនេះដែលលោកគិតថាមានចំនួនរហូតជាង ១០ ០០០ក្បាលហើយ។

លោក ហឿន សុផល បានបន្តថា ហ្វូងសត្វជ្រឹងទាំងនេះពិតជាមានភាពទាក់ទាញ និងផ្តល់ចំណាប់អារម្មណ៍ខ្ពស់សម្រាប់អ្នកទស្សនា ព្រោះការរស់នៅរបស់ពួកវាមានសភាពចម្លែកទាំងដេកទាំងតោងមែកឈើត្រូវសំយ៉ុងក្បាលចុះក្រោមរហូត ដោយជើងវាតោងពាក់ជាប់នឹងមែកឈើប្រកបដោយលក្ខណៈសិល្បៈដ៏ប៉ិនប្រសព្វ ហើយរូបរាងវាគឺប្រហាក់ប្រហែលនឹងសត្វប្រជៀវ តែមុខមាត់វាស្រដៀងទៅនឹងសត្វឆ្កែទៅវិញ។

អនុប្រធានមន្ទីរទេសចរណ៍ខេត្តបាត់ដំបង លោក ហម អរុណ បានឲ្យដឹងដែរថា ទំហំសត្វជ្រឹងនៅបាយដំរាំខាងលើនេះ ចាត់ទុកថាជាគោលដៅមួយសម្រាប់ការទាក់ទាញភ្ញៀវទេសចរ។

លោកថ្លែងថា ខាងមន្ទីរទេសចរណ៍ខេត្ត បានជំរុញការផ្សព្វផ្សាយ និងលើកទឹកចិត្តឱ្យភ្ញៀវទេសចរ និងប្រជាពលរដ្ឋ ចូលរួមក្នុងការអភិរក្ស ខណៈបច្ចុប្បន្ននេះសត្វជ្រឹងមានចំនួនច្រើន៕